21 May 2008

عمار يا مصر




شيل يا ونش بلادى

ادى الناس اهى

بياكلوا فول







منتظرينك ياعم شادى يا حفيد الريس
اما شعب واطى صحيح











اختراع حديث جدا
خوذه حديثه من اختراع عالم مصرى ابن بلد

شعب مصر محدش يقدر يغلبه خالص
ولا حاجه تتعبه












مش بس انت لوحدك يا انور تلوث
دا فى غيرك كتير
حاجه تفتح النفس صحيح












روتانا دخلت فى كل حاجه فى حياتنا
تقولش عامله لنا عمل يا اخى
مش كفايه العنين هايبقى البق كمان









حتى المبانى عامله رجيم
مش بس البنى ادميين
سبحان الله















متشكرين ياريس
ياما نفسى يجى يوم تهدى فيه للشعب المسكين حريته









هى جات على دى يعنى
مافى حاجات كتير زباله
الشعب المسكين بيشرب وياكل ويتنفس زباله
وعايش فى زباله
وكله زباله فى زباله

13 May 2008

حمله دوليه.....الفول فى القلب





بعد قرءاتى لخبر تصدير الفول الى الكيان الصهيونى

اصابتنى صدمه عنيفه من جراء الخبر

والدنيا لفت ودارت بيا

واظلمت مره واحده قدام عينى


الفول


طيب هم غللوا البنزين وقلنا ماشى


صدروا الغاز وقلنا طناش
والبلد متبهدله وقلنا عميان

لكن توصل للفول

اقولها بملىء فمى

لا لا لا والف لا

الا الفول

هنا بقى انتم تعديتم حدودكم

كده بقى كشفتوا عن نواياكم الخبيثه فى تجويع الشعب وتجويع العبد الغلبان



انا عارف المؤامره دى

انتم لقيتونى باحب الفول جدا

وباعشقه

وانا وهو زى العسل مع بعض
ومحدش قادر يفرق بيننا

رحتم بعتوه يا خونه

منكم لله

بس انا مش هاسكت باذن الله

ومن مدونتى اعلن

انطلاق حمله مطالبه

بوقف تصدير الفول للكيان الصهيونى او لاى دوله تانى

وعنوان الحمله



الفول فى القلب


وعاوزين الناس كلها تشارك معايا فى الحمله دى

اطالب اخوانى واخواتى والناس
كلها
بنشر هذه الحمله

وسوف نقوم باذن الله تعالى بتوضيح ما يجب فعله لتوصيلها الى اعلى مستوى

تقف معايا علشان خاطر الفول يرجع لى تانى

حبيبين يا ناس وعاشقين

انا وهو من زمان

جاؤا الخونه وعاوزين يبعدوا بيننا

يرضيكم حبيبين وعشرة عمر يتفرقوا كده عن بعض

حسبى الله ونعم الوكيل

فين حقوق الانسان

وفين الامم المتحده
ومجلس الشعب

والمنظمات الحقوقيه

انا هارفع صوتى وبكل قوه


اطالب بعودة الفول الى وطنه واسرته التى سيصيبها التشرد من بعده

الطعميه

والمسقعه
والمخلل

والبطاطس

العيال دول كلهم يروحوا فين يعنى عاوز
منكم لله يا فاسدين ياخونه


اذرف عليك يافول الدموع
وقلبى ينفطر بين الضلوع
دا انا من بعدك اتشرد واجوع
اطالبك فورا يافول الرجوع
---------------------

للعدوا الخونه صدروك

وللعملاء راحوا باعوك

منى يا حبيبى قاموااخذوك
وللكلاب راحوا رموك
----------------------------

غللوا الطعام وغللوا الحديد

لكنى صابر صلب وعنيد

وعن الفول لايمكن احيد
دا حبى له دايما شديد
-----------------------

اخذوك يا فول من بين العيله

عيله بسيطه وحياه جميله

دانا باحلم بيك كل ليله

والاجسام من بعدك هزيله


-----------------------

عيلتى هم الفول والطعميه

ومخلل ومسقعه وبطاطس مقليه

ماليين عليا الدنيا ديه

وشايل جميلهم جوه عنيا

-------------------------

انت يا فول غالى عندى

انت وعيلتك ساكنين قلبى

رافع ايدى وبادعى ربى

تفضلوا كلكم دايما جبنى

-------------------------

روحى ودمى هو الفول

هافضل احبه ياناس على طول

دا انا من بعدك صحتى فى النزول

هاصرخ وباعلى صوت هاقول

بالروح بالدم افديك يا فول

--------------------



09 May 2008

كيلو الحريه بكام؟؟

اعلان هااااام
بعد ارتفاع الاسعار فى مصر المحبوسه
اعلنت الحكومه المصريه
عن انقطاع الحريه لمده لا يعلمها الا الله
وعلى الساده المواطنين
ممن لديهم رصيد من الحريه
او محوشين حاجه تحت البلاطه
فعليهم تسليمها فورا الى اقرب مقر لامن الدوله التابع له
والا فان القوات المختصه ستقوم بتفتيش المنازل
وعلى من يعلم ان هناك شخص مخبى شويه حرية يبلغ عنه
وله هديه كبيره على قفاه
----------------------

نكمل الحوار بتاعنا

طلعت من امن الدوله ومعايا بجنيه حريه
مختوم من امن الدوله نفسها
وطلعت رحت اشترى كارت حريه
قلت فى بالى وليه اضيع الحريه اللى معايا دى
وبعدين اروح اتبهدل تانى
خلى معايا شويه
واتمنظر بيه على اصحابى فى الكليه
ورحت تانى يوم الكليه
ونافخ نفسى كده
اصحابى بيقولوا مالك انهارده فرحان ومنفوخ كده
عامل زى الناس الاحرار
اسكت يا بنى انت وهو انا فعلا منهم
معايا بجنيه حريه
مصدقوش غير لما طلعت التصريح بتاع امن الدوله
وشافوا الختم على قفايا
ياااااه انت حر
ايوه يا بنى
بجنيه محدش يقدر يكلمنى تانى
لحد ما اصرفه
واحد صاحبى قالللى اجرى على البنك حطه هناك
خليه يعملك فوايد على حريتك
ويبقى عندك رصيد منها
قلت لا ياعم احسن البنك يعلن افلاسه
وابقى لا طلنا لا حريه ولا عبوديه
قاللى براحتك

المهم على اخر اليوم

لقيت قدام الكليه كام عربية شرطه واقفين
ولما نزلت
راحوا اتلموا عليا
ومسكونى
اتاريه واحد عصفور تبع امن الدوله
بلغ عنى انى معايا كارت حريه
انت يا بنى انت جبت الكارت ده منين
يا باشا دا لسه واخد التصريح امبارح من امن الدوله
ورينى طيب

الكارت ده كسب غير شرعى
غسيل اموال يعنى
وهنحاكمك محاكمه عسكريه
ليه يا باشا
عملت ايه
حرام عليكم كده
ياللا يا بنى اركب معانا بالذوق
اقولك يا باشا
خدوا ليك هديه متواضعه منى لك
وبلاش تاخدنى
طيب ياللا هاعد من واحد لواحد ونصف واياك اشوف وشك قدامى
وجررررررىىىىىىىىى
وصت البيت
مضايق وعلان
امى
مالك يابنى فى ايه
مفيش اصله كارت الحريه اللى اشتريته راح
راح ااى يا منيل
انت وديته فين
الظابط اخده يا امى وراح
وحكيت لها الموقف
فداك يابنى
المهم سمعت الخبر الجديد
ايه خير
هايطعمونا فى المستشفيات
يطعمونا
ضد ايه بقى
هايعطونا جرعات حريه
كل واحد نقطه فى الشهر
وعاوزين من كل واحد ملف بتاعه من امن الدوله
كمااااان؟
طيب
من بكره هاروح
لما نشوف اخرتها




---------------------------




وانتظروا باقى القصه